Dad Awarded as Outstanding Prosecutor

Nitong Huwebes, 20 Agosto 2009 ay pinarangalan si Dad ng Volunteers Against Crime and Corruption (VACC) bilang isa sa mga "Outstanding Prosecutor" para sa taong 2009.

Sina VACC Founding Chairman/President Dante Jimenez at Chairman Lauro Vizconde, kasama ang kasalukuyang Dept. of Justice Secretary Agnes Devanadera ang naggawad ng parangal kay Dad.

Bukod sa parangal, natuwa ako sa mga pagbati ng mga tao sa aming mag-ama. Ang parangal daw ay para na ring "vindication" sa mga pinagdaanan namin noong kasagsagan ng "Alabang Boys" controversy.

Binati rin ako ng ilan sa mga nakasalamuha naming taga-VACC at kapwa piskal ni Dad sa DOJ para sa aking pagkakasulat ng liham sa The Philippine Star noong Enero.

Ilan pang retrato:

NBI Director Mantaring, Captain Diño, Cory Quirino, DOJ Sec. Agnes Devanadera, VACC Founding Chairman/Pres. Dante Jimenez, Dad, VACC Chairman Lauro Vizconde.

Ang parangal. Mali ang spelling ng pangalan ni Dad hehe. (Double L at hindi P dapat.)

Si Dad kasama ang limang kapwa awardee, ang mga matitinik na babaeng prosecutor ng DOJ na humawak sa kaso ng "Boratong shabu tiangge."

National Artists File Petition at the Supreme Court

Agosto 19, 2009: Pumunta ang mga Pambansang Alagad ng Sining Virgilio S. Almario (Rio Alma) at Salvador Bernal, kasama ang mga artista, iskolar, at kaibigan sa Korte Suprema upang maghain ng petisyon laban sa dagdag-bawas na naganap sa National Artist Awards.

Nagkita-kita kaming limang Dapitdilim/LIRA writers (Ynna, Debbie, Carla, Jere) sa LRT2 Recto bago sumakay ng LRT1 papuntang Taft. Buti nakaabot kami sa 10 A.M. na call time.

Di ganoon karami ang mga tao kaysa noong 'lamay' sa CCP at rally sa NCCA, pero masaya pa rin ang atmosphere. Dalawa lang ang National Artists dahil nakapirma na ang iba sa petition.

Lagpas tanghali na nang umalis kami ng Supreme Court. Tinungo ng grupo namin nina sir Rio ang Robinsons Ermita para mananghalian. Aristocrat ang napili. Dahil medyo kapos ang budget naming 5 'bata', nagboluntaryo si sir na sagutin ang tig-100 sa pagkain namin. Hehe.

Dapat ay dadalo ako sa hapon sa awarding ceremonies ng UP Manila - Sentro ng Wikang Filipino literary contest kung saan naging hukom ako. Ang kaso, medyo nagtagal kami sa Aristocrat kaya di na ako nakahabol.

Humiwalay na kaming 5 sa mga seniors pagkatapos mananghalian. Naglibot-libot muna kami sa Robinsons bago pumunta sa Malate (Adriatico) para magkape sana sa Penguin. E sarado pa pala. Ayun, napunta tuloy kami sa Starbucks (walang ibang bukas) at mas napagastos.

Inabot kami ng gabi sa pagtambay. Adventure ang pabalik sa LRT1 sa Taft; di namin kabisado ang Malate kaya napakalayo ng aming nilakad. Napunta pa kami ng Quirino Avenue. Sa LRT2 na kami naghiwa-hiwalay.

National Artist Awards' Funeral 2: Motorcade, Rally

Agosto 7, 2009: Pagkatapos ng 'necrological service' ng National Artist Awards sa CCP Ramp, ang daan-daang artista at kaibigan ng sining na nakiramay ay nag-motorcade patungong opisina ng National Commission for Culture and the Arts (NCCA) sa Intramuros.

Nakasakay ako sa kotse ni sir Rio Alma (National Artist for Literature) kaya medyo naunang nakarating sa Intramuros. Nagtampo pa nga si Ynna dahil iniwan sila ni sir (na kinaladkad ako dahil may dala akong camera) sa CCP; nakasakay naman sila sa kotse ng mga Borromeo at nakasabay si Nick Pichay, kaya masaya ang lahat sa huli hehe.

Mula CCP, tinahak ng mahabang convoy ang Roxas Boulevard kung saan nakalinya pa ang mga dilaw na watawat nina Cory at Ninoy Aquino. Amin ang isang buong lane. Mahaba ang convoy. Akala tuloy ng mga motorista at commuter e related kay Cory ang prusisyon namin, lalo't may malaking wreath sa unahan ng motorcade.

On the way, nagsakay ng mga nagmamartsa ang mga kotseng may bakante pa. Dalawang coed freshmen ng PWU ang sumama sa amin ni sir Rio.

Paglagpas sa Anda Circle at pagpasok sa Intramuros, sinimulan na ang noise barrage. Lahat ng kotse sa convoy, bumusina. Bumusina nang bumusina hanggang makarating sa NCCA. Naligalig ang buong Intramuros.

Pagbaba namin sa NCCA, sinalubong kami ng malakas na musika mula sa dalawang speaker sa entrance. Pilit dinadaig ang mga busina at sigaw ng mga tao: "Artista ng bayan, ngayon ay lumalaban!"

Lagpas isang oras siguro nagprotesta ang mga tao sa labas ng NCCA. Electric ang atmosphere at masaya. Well, hindi masaya ang ibang tao tulad ng aktres na si Angie Ferro na nakipagsigawan sa mga nagpoprotesta, o ang sekyu ng NCCA na nagulantang nang hugutin ng isang raliyista ang speaker para matigil na ang musika.

Hindi nasilayan si Cecile Guidote-Alvarez. Mapayapa namang nag-disperse ang mga tao, pero pagkatapos lang magbabala kay Guidote-Alvarez na "Babalik kami! Mas marami!"

Tinungo namin nina sir Rio (mga taga-LIRA at iba pang manunulat at kaibigan) ang Harbor Square para -- ano pa ba? -- uminom at 'magpahinga.' Nang matapos naman 'yun, nagpaiwan kami nina Ynna at Debbie (the Dapitdilim trio) para sa isang barkada talk. Lagpas hatinggabi na nang umuwi kami.

National Artist Awards' Funeral 1: Necro at CCP

Agosto 7, 2009: Daan-daang artista at kaibigan ng sining ang pumunta sa 'necrological service' ng National Artist Awards (1972-2009, death by dagdag-bawas). Kung di ka nakatoka sa mga balita, hanapin na lang sa Google ang tungkol sa kontrobersiya; keywords: Cecile Guidote-Alvarez & Carlo J. Caparas.

2 PM nagsimula ang unang bahagi ng programa ("Lamay") sa Cultural Center of the Philippines Ramp na tadtad sa mga personalidad. Kahit nakaitim at nagluluksa sa pambababoy sa Gawad Pambansang Alagad ng Sining, masaya ang mood ng mga tao.

Maulan pagdating ko sa CCP pero sa awa ng Diyos e umaraw buong hapon. Tingnan na lang ang mga retrato para sa daloy ng programa.

Pagkatapos, sinimulan ang motorcade ("funeral cortege") patungong Intramuros (NCCA office). Dahil may camera, sinama ako ni sir Rio Alma sa kanyang van na isa mga naunang kotse sa convoy...at nasa susunod na album na 'yun.