LIRA Poetry Clinic 2009: Opening Day

Hunyo 7, 2009: Unang araw ng LIRA Poetry Clinic at public lecture ng National Artist for Literature Rio Alma sa UP Diliman. Unang araw ng anim na buwan na katayan. Matagal ko ring inantay ang araw na 'to, lalo't ito ang unang klinika sa termino ko bilang Pangulo.

Sa umaga, nagkaroon ng orientation ang higit kumulang 35 bagong workshop Fellow. Nagpakilala rin kaming mga Kasapi ng LIRA.

Sa hapon, nagbigay si sir Rio ng kanyang tradisyunal na panayam, ang "Reklamasyon ng Pambansang Gunita." Mas kaunti ang nakadalo sa panayam kaysa nakaraang taon, dahil na rin Linggo at nagkaroon ng pagbabago sa iskedyul.

Pagkatapos, tinungo namin ang Sarah's Beer Garden para sa nakasanayang first-day inuman. (Well, tumotoma naman kami pagkatapos ng halos bawat LIRA session hehe.) Nakasama ng ilang bagong Fellow sina sir Rio, Michael Coroza, Edgar Samar, at mga Kasapi ng LIRA.

Magha-hatinggabi na nang pumunta kami nina Ynna, Debbie, at Jere sa Starbucks Katipunan para tumambay at magtanggal ng amats. Nang magutom, naghanap kami ng makakainan. Sa paglalakad-lakad namin sa Katips, nasaksihan pa tuloy namin ang isang accident scene -- may kotseng tumilapon sa kabilang lane, sa tapat ng Ateneo. Nag-taxi na kami papuntang Mister Kebab sa West Avenue kung saan halos inabot na kami ng bukang-liwayway.

Nakapapagod ang araw, pero masaya. Napagtanto ko rin na ambilis ko nang tumatanda -- 2 taon na ang nakalipas mula nang sumabak ako sa LIRA Poetry Clinic 2007.

(May ilang retrato dito mula sa camera ni JC Sola.)