Interview w/ Ces Drilon: "DOJ prosecutor: My conscience is clean!"

Ininterbyu kami kahapon ni Ces Drilon sa inuupahan naming apartment unit. Kinuha niya ang panig ni dad sa "Alabang Boys" bribery allegations, at nilibot nila ang bahay namin.

Mga 2 oras yata silang namalagi, pero dahil kapos ang espasyo sa balita, onti lang sa mga sinabi namin ang nakapasok. Pero ayos pa rin. Kung hindi dahil sa bisita ni ma'am Ces (at ni Ms. Rawna Crisostomo noong Linggo - read previous blog post and my letter to The Philippine Star), hindi lalabas sa media ang istorya namin.

Eto ang video ng feature na lumabas sa Bandila (ABS-CBN) kagabi. Kinuha ko 'to mula sa http://www.abs-cbnnews.com/video/nation/01/14/09/doj-prosecutor-my-conscience-clean . Baka lumabas din daw 'to sa TV Patrol mamaya, kung may espasyo.



(Kung ipapamahagi niyo ang video na 'to, i-klik lang po ang "Get and Share" sa baba, tapos piliin ang option na "Start playing from This Show" kesa "Most Recent Show", kundi ibang video ang lalabas.)

Maraming maraming salamat kina ma'am Ces at sa kaniyang crew at assistant. Naramdaman ko ang simpatya niya noong nag-uusap kami. Ibinahagi niya rin kasi ang kuwento ng kanyang buhay: mataas ang panunungkulan ng kanyang ama sa military (heneral ata?) pero naging simple lang ang pamumuhay nila.

Gaya ko, lumaki si Ces Drilon na nagtataka kung bakit ang ibang kasamahan ng ama niya ay may magagarang kotse at bahay. Kaya siguro hindi na rin ako nahiya na sabihin sa interview na lumaki akong galit sa mayayaman. (Pero di na nakalabas sa Bandila 'yung bahaging 'yun.) Humupa na lang ang galit na 'yon sa pagtanda ko. Sabi ko nga kay ma'am Ces, ang pagsusulat ko na lang ang panlaban ko sa mga kalokohan ng lipunang 'to.

Binibiro rin ni ma'am Ces si Daddy na talagang sinundan ko ang mga prinsipyo niya: si Daddy, namuhay nang tapat at malinis, hindi tumatanggap ng suhol kahit wala kaming pera. Ako, pinasok ang isang career (writer & poet) kung saan wala ring pera.

Eto pala ang ilang pics mula sa hapong iyon:

Interview kay Dad sa sala.

Tinitingnan ang mga nakasabit sa dingding.

Binabasa ni Ces Drilon ang mga tula ko sa Likhaan journal.

Interview ko.

Pinapakita kay Ces Drilon ang headlights na natatanggal sa lalagyan.

Dad & Ces Drilon.

Kami, nag-uusap.

Group pic. (Nakakatuwa si ma'am Ces, siya pa ang nag-aya!)

Ces Drilon, Dad, ako, Ynna.

Kami ni Dad, nag-uusap pagkaalis nina Ces Drilon.

* * * * *

Uulitin ko lang: gusto kong magpasalamat sa mga taong nagdasal, nagtext, nag-email, at nagpakita ng suporta sa pamilya namin. Paumanhin po't hindi pa rin ako nakakapagpasalamat nang isa-isa sa inyo.

Maraming salamat.