If PDEA Has Its 'Incorruptible' Major, How About DOJ's Honest Prosecutor?

Hulog ng langit ang interview kanina ng GMA-7 (Rawna Crisostomo) sa dad ko. Nakita tuloy ng buong bansa, kahit saglit lang, kung gaano kalinis ang serbisyo ng ama ko bilang prosecutor mula pa 1991. (Basahin ang nauna kong blog post.)

Sa mga ayaw maniwala:

Nabubulok at second-hand naming 1996 Lancer.

Daddy & Ms. Rawna sa tapat ng apartment unit naming inuupahan (at tanging tahanan kong nakilala sa 23 taon ko sa balat ng lupa).

Siksikang interview sa loob ng apartment.

Kasama ang kung ano-anong nakasabit sa dingding.

Daddy, iniinterbyu.

Kinunan din ng cameraman ang iba pang bahagi ng bahay, pero di na 'yun lumabas sa TV. Nakakahiya nga kasi kailangan ko pa siyang sabihan ng "Sarhan niyo na lang ang ilong niyo." Medyo mabaho kasi sa may kusina. Dumumi yata 'yung isa naming pusa sa kung saang di-nalilinis na sulok. Lagi namang ganun sa 'min, kaya madalang akong mag-imbita ng kaibigan sa loob.

Kung di pa sapat 'yan, basahin ang nauna kong liham sa isang kolumnista sa The Philippine Star (na ewan ko lang kung bakit di inilalabas sa Letters to the Editor ng ilang pahayagan): http://thecorsarius.multiply.com/journal/item/42/My_Letter_to_The_Philippine_Star

Pasensya na kung parang desperado ang tono ng panananalita ko. Halos lahat kasi ng nakikita kong blog post at balita ay anti-prosecutors.

Ginagawa ring bayani si Marcelino ng PDEA. (Di ba hindi pa raw sumisipot sa imbestigasyon ng NBI? At nasaan ang ebidensya ng panunuhol sa DOJ? Hindi ba si Gen. Santiago na mismo ang nagsabing "psy-war" lang ang nangyari?)

Pero sa huli, wala akong pakialam sa kanya, kay Gen. Santiago, kay Atty. Lazaro, sa PDEA. Ang pakialam ko, ang ama ko.

At kung nabasa mo sa mga retrato, ayun nga -- pinagli-leave of absence daw sina Daddy ni Pangulong Arroyo.

Ewan kung anong klaseng mundo 'to.

Ang tanong ko nga kay Dad (kasama si Ms. Rawna), "Paid leave ba 'yun?" Kasi kung hindi, saan namin kukunin ang pang-araw-araw na gastusin? Sagot ni Dad, "E di ikaw na lang magpapakain sa akin." Napatawa na lang si Ms. Rawna.

Kaibigan, kung puwedeng humingi ng pabor: Paki-pasa, paki-kalat ang post na ito. Kopyahin niyo ang pics, walang kaso, bagkus ay ipagpapasalamat ko pa. Please share.

Maraming, maraming salamat sa mga dati nang nagpakita/buhos/paramdam ng suporta sa akin at kay Dad. Maraming salamat na rin sa mga susunod pang may mabubuting loob. Salamat.