Dapitdilim Writers: San Fabian Beach Workshop

Part 4 ng excursion ng aming munting samahan, ang Dapitdilim Fellowship of Writers, sa mga bundok at dalampasigan ng Hilaga (Benguet at Pangasinan).

Setyembre 21, 2008: Pagkatapos ng aming pilgrimage sa Our Lady of Manaoag, nagkaroon kami ng isang lit workshop sa dalampasigan ng San Fabian (karatig na bayan ng Mangaldan, kung saan nakatira sina Ynna).

Pero bago 'yun, mula Manaoag ay dumaan muna kami sa George's, isang tago ngunit magandang kainan sa Dagupan City. Ginusto kong malaman kung ano ba ang pinagkaiba ng Ilocano Pansit Batchoy sa aming Batchoy sa Aklan/isla ng Panay, kaya 'yun ang inorder ko. (Ang pagkakaiba: may anghang.)

Pagkatapos kumain, nagpa-print at photocopy pa kami ng mga tula at prosa na iwo-workshop. Tapos ay umuwi na kami ng Mangaldan para magbihis ng 'beach attire.'

Sumakay kami ng jeep papuntang San Fabian, at nag-tricycle para pumunta sa dalampasigan. Doon ay nagrenta kami ng cottage (kailangan pang mag-Pangasinense ni Rey para matauhan ang nagpaparenta na 'wag kaming utuin).

Dahil takipsilim (dapitdilim?) na, ilang minuto lang kaming nakapag-piktyur-piktyur at swimming. Sunod naming nilunod ang aming mga sarili sa alak (strawberry wine mula Baguio at alak na ginagamit sa Consecration sa Misa -- pari ang kuya ni Ynna hehe), beer, at videoke.

(At oo, napakanta ako. Unang beses kong pumatol sa videoke.)

Pagkatapos ng kasiyahan ay nagseryoso na kami. Ang isinalang sa workshop: prologo at unang kabanata ng novel-in-progress ni Jack, na nasa Saudi ngayon upang sumahod.

Isang kahindik-hindik na karanasan (well, para kay Romeo): Madilim. May sumitsit kay Romeo mula sa di-kalayuang bahagi ng beach. Pagtingin ni Rhom, itinaas ng isang matandang babae ang kanyang palda! Prosti kaya 'yun o buwang? O multo kaya? Sa muling paglingon ni Rhom (pagkatapos niya kaming tawagin), nawala na ang babae.

Bago mag-alas nuwebe ay bumalik na kami ng Mangaldan para makapagpahinga, dahil bisperas na 'yun ng pagtuturo namin ng tula sa Dagupan...at nasa sumunod na album na 'yun.

Ang listahan ng mga albums ng aming 'bakasyon':

• Part 1 -- Dapitdilim Writers: Baguio (Cafe by the Ruins)


• Part 2 -- Dapitdilim Writers: Baguio (Burnham Park, Biking)


• Part 3 -- Dapitdilim Writers: Manaoag Pilgrimage


• Part 4 -- Dapitdilim Writers: San Fabian Beach Workshop


• Part 5 -- STS Dagupan: Teaching Poetry in a Flooded School

Background ng aming buong paglalakbay:

Isinabay namin ang "lit trip" na 'to sa Sining ng Tugma at Sukat (Art of Rhyme and Meter) program ng LIRA at National Commission for Culture and the Arts sa Dagupan, kung saan malapit nakatira ang dalawa sa amin (Ynna & Rey).

Kami ni Rey ang coordinators para sa STS Dagupan, at kasama namin sina AC, Debbie, Romeo, at Ynna sa pag-workshop sa mga delegates. Hindi nakaabot si Melvin sa araw ng STS dahil may kailangang gawin sa Maynila.

Bago ang araw ng STS (Lunes) at pagiging LIRA, sangkatutak muna ang ginawa naming bonding bilang magkakaibigang manunulat sa Dapitdilim (mga pinagbuklod ng Dapitan/UST at Diliman/UP).